细汉时，我诚爱恬恬ti7边a听大人讲话，虽然阿爸、阿母教阮讲e7是国语，但是in拢
是讲台语大汉e7，平常时嘛用台语抬杠，所以我定定是鸭子听雷，不过我ia2是爱toe3 ti7
阿母边a，听伊kah阿妈、阿姨、阿舅讲电话，kah厝边秀春阿姨讲东讲西，有一句没一句e5
嘛是诚趣味。
真正hou7我想欲认真学台语e5是外妈──阿母e5妈妈。阿妈诚疼孙，逐遍来拢koaN7
ga2大细包，阮嘛是阿妈长阿妈短e7，只是会晓讲e5伤少，所以拢讲ga2咿咿唔唔，hou7阿
妈爱笑，尾仔，我为著欲hou7阿妈听有，一字一字讲，定定讲一半抵著be7晓e5，著随用国
语问妈妈，chiah阁继续kah阿妈讲。
阿妈定定讲：‘阿慧仔，你爱好好读书，bat字chioh2好！像我be7 bat字著be7路用…
…。’我讲：‘be7啦！阿妈你紧有路用啊！你会晓讲台语、会晓做好吃e7粿、会晓挽面、
阁甲妈妈饲大汉hou7我……。’阿妈只是笑笑讲我是憨niN2仔。我阁讲：‘阿妈，你教我
台语，我教你国语，好无？’阿妈笑笑讲：‘你niN2仔人学卡快，阿妈老仔，学be7晓啦！
’‘会啦！会啦！阿妈我教你啦……’阿妈没法度，只好答应我，了后，我e5台语卡实进
步诚多，但是我并没做好老师e7职责，因为阿妈kah chit-ma2 ia2干单会晓讲"苹茍"〈苹
果〉nia7 nia7。
我bat想过：那使我有另外一个疼我e5外国阿妈，我e5英文是m7是会卡好咧？伤少，我
一定敢讲出嘴，m7干单是会晓考试nia7。