前几工仔写兮，感觉会使铺伫遮
西班牙伫中世纪兮时，其实有足济国家，大概会使分做两爿，北爿是基督教兮国家，南爿是
伊斯南教兮国家。两爿为著抢领土，以及宗教兮差别，真无对同，定不时嘛拍来拍去，战甲
流血流滴。毋过嘛捌有偷来暗去，揣对面无仝教兮来做伙应付家己兮教友邻国这款代志，规
个半岛势面有影花嗄嗄。
伫公元九世纪初期，有基督徒伫岳里施野 (Galicia) 揣著圣徒圣雅各兮墓，自按呢发展起
来，成做基督教世界诚重要兮圣地，吸引袂少基督徒去遐朝圣。遮兮信徒寄付兮缘金嘛予西
班牙基督教国家大趁钱。甚至有信徒留落来，做伙对付南爿兮伊斯南教国家。原底守伫半岛
西北部山区，参基督教世界没啥交插兮基督教西班牙，嘛自按呢开始和欧洲交流，得着欧洲
国家兮帮赞。
公元十一世纪，西班牙兮伊斯南教国家沓沓仔咧落衰。为著应付北爿兮威胁，怹着去揣阁较
南爿，徛伫咧北非兮伊斯南教国家来斗跤手。毋过，代志毋是戆人所想兮遐呢简单。新来兮
跤数野心伤大，竟然共西班牙兮伊斯南教国家拢总拆食落腹，暗算欲一统半岛，落尾才去予
北爿兮基督教国家拍败，跤底抹油走路转去北非。
这着是咧共逐家讲，朋友爱揣会正经斗相共兮，嘛毋免惊好朋友来厝里行踏。阿若彼号会反
背兮、抢火烧兮，爱好是闪较远兮，上好无交插。