公视新闻网 https://news.pts.org.tw/article/679618
年货四秀仔百百款 寸枣是啥？米荖麻荖相仝？
发布时间：2024-02-03 19:15 更新时间：2024-02-03 19:48
https://www.youtube.com/watch?v=6NW3pwdrUac
过年时仔，囡仔上欢喜的、就是通食著各款四秀仔。有一寡四秀仔，各位观众朋友可能对
细汉食到大汉，煞无一定知影in台语是号做啥物名。这嘛咱缀镜头、到年货大街，看这寡
四秀仔用台语按怎唸。(这则新闻标题、前言、内文为台语文。)
民众拢趁好天气出来办年货，过年时仔咱会食真济四秀仔，毋过遮的四秀仔台语按怎唸，
民众敢知影？
记者实际街访民众，麻荖、米荖民众拢较知影，咱换另一款四秀仔（寸枣），继续问民众
看觅。
民众表示：“我连伊华语是啥我拢毋知，毋知，无看过。”
“啥物，啥物酥？敢若无看过呢？有啦有看过 袂晓唸。”
“这我袂晓讲。”
“豆枣喔？”
逐家过年时仔捷食的四秀仔，除了这款糋过、包麻仔、抑是米的麻荖、米荖以外；第二款
捷看着的，就是这款号做寸枣的食物；阁有这款内底是涂豆、外层包粉红仔色、白色糖的
“生仁”；落尾阁有这种用糕仔粉做的、通变做各款造型的糕仔。另外四秀仔按怎号名，
也有趣味的故事。
台语顾问苏世雄表示：“彼个叫做寸枣。我咧想可能，和彼个长度差不多一寸，彼个大概
有关系。有的讲米荖、抑是讲麻荖，荖我咧想是毋是老大人疼囡仔，拢共囡仔当做宝贝，
我这个ló，毋过这是抄字头的啦，通常这个ló有一点感觉讲，足宝贝的、足疼惜的彼款
感觉。”
苏世雄讲，平常时序大踮厝的时、就要和囡仔讲台语，过年囝孙序小转来团圆，对四秀仔
开始教怹台语，用台语学讲好听话，予台语在生活中自然使用，台语和台湾文化才有法度
代代传。
张曼亭/编辑