公视新闻网 https://news.pts.org.tw/article/773309
寿山马卡道屎蟹铗薰头 环境污染损荡生态
发布时间：2025/10/2 19:15 更新时间：2025/10/2 22:17
https://www.youtube.com/watch?v=qmKM8cUpxG4
高雄寿山有巡山队志工，这几年发现当地特有的马卡道屎蟹大量死亡，最近伫南寿山的步
道，阁翕著一只马卡道屎蟹，毋知对佗铗薰头欲转去岫，志工表示，附近不时看着粪埽乌
白掷，沟仔内底的马卡道屎蟹死的比活的济，怹诚烦恼当地的生态可能出现问题。（新闻
标题、导言及内文皆为台语文）
一只马卡道屎蟹共薰头铗牢牢，沿路行沿路幌，看起来就亲像是伫咧食薰仝款，有人感觉
心适，毋过这个画面予巡山队志工是看甲诚心痛。志工讲，南寿山环境教育步道，是这款
特有的马卡道屎蟹的大本营，以早来遮，规个沟仔底、路里拢爬甲密密，毋过这站仔看着
的是死的比活的济，伊认为环境的改变已经对马卡道屎蟹的生湠造成危机。
柴山巡山队志工 郭高义：“为啥物毋放手有伊的理由；是毋是这爿的食食减少矣，伊就
食粪埽矣？薰头嘛算是粪埽的一种。”
国立中山大学学生 张隽曦：“可能咱伫咧环境的意识顶悬阁需要加强，毋过至少爱对家
己的身躯边开始做起你制造啥物款一改性的粪埽，就尽量共扎走。”
南寿山环境教育步道是伫咧中山大学的校园内底，附近学生囡仔来来去去，嘛有诚济人会
来遮peh山，毋过人一济，粪埽的问题就缀咧来。接受国家自然公园管理处委托研究马卡
道屎蟹的教授讲，根据113年的调查，初步估计马卡道屎蟹的数量大约是3万7千只，若是
生湠地有环境污染的问题，确实是一个危机。
中兴大学生命科学系教授 施习德：“水质确实会影响着伊的存活率，因为伊就是爱较清
气的水质。若干焦薰头犹无啥要紧，毋过若是粪埽，我想彼的影响会阁较大，因为你毋知
影是啥物款的污染物伫内底。”
教授强调，因为对马卡道屎蟹的调查研究才拄开始，目前犹无一个科学性的数字来证明族
群数量的变化，柴山巡山队是呼吁政府爱设立告示牌，加强宣导生态保育的重要性。
记者 许嘉茹 邱绍扬 高雄报导
唐嘉良/编辑