公视新闻网 https://news.pts.org.tw/article/722102
康芮扰乱祭典 台南武德宫共王船拖转府内囥
发布时间：2024-10-31 19:15 更新时间：2024-11-01 00:05
https://www.youtube.com/watch?v=jguAlWvTmOc
康芮风台扫来台湾，庙宇仝款爱做好防台，尤其阁拄著欲送王船。亲像台南仁德十三甲武
德宫，只好共已经出府的王船阁拖转去囥；抑若另外一搭武英殿，庙方暂时先共船顶鲤鱼
公请落来，兼用铁仔来共船身楗牢咧。（新闻标题、导言及内文皆为台语文）
台语台记者 李晨宇：“这马记者就伫十三甲武德宫，本成这王船是伫平安桥遐，会使予
民众祈求保平安，不而过这改风雨是有较大，致使庙方落尾是共神明请示，结果是先共王
船徙入去王船府内底，就惊船身去予损荡去。”
这回阆18年的建醮大典，庙方今仔做好这只欲予人朝拜的王船，顶礼拜六才热闹出府尔，
煞拄伫风台来扰乱，惊风雨伤大，落尾庙方先共王船拖转去王船府囥。另外，in嘛做一只
替身欲来送王使用，王船厂本来门拢拍开的，这阵暂时拢先关起来。
仁德十三甲武德宫总干事 苏进男：“王船先请回咱的王船府，按呢较安全。咱的牌楼参
较大的所在，阮拢先拆除、拆落来。”
文史工作者 谢奇峰：“足济物件是活的啦，宗教欲爱予咱有智慧。正常来讲（王船）是
拖出来，无阁入去矣，毋过是真正风台伤大，你若王船因为按呢共挵歹去，按呢后壁欲送
王船欲按怎？”
另外这爿仝款有王船的武英殿，阆28冬，这阵当咧做王猷大典，按算初三欲送王，这阵王
船是伫庙埕外口，庙方讲，目前有用做枋模咧用的铁仔来楗牢咧，嘛惊食风，船身会搟，
就有志工驶家己的车来予船靠牢咧，厝边头尾嘛烦恼祭典受影响。
在地居民：“拄著这风台嘛无法度。（记者：敢会烦恼王船受损？）逐家拢会烦恼。”
南厂武英殿总干事 林柏宇：“阮共顶悬的帆佮桅三支拢共请落来，包括咱顶悬的押班水
手、鲤鱼公，拢提早先共请落来。”
康芮台风的暴风半径大，影响台湾的时间长，范围嘛较大，咧做醮的庙宇是拼势咧防灾，
就向望这科醮通会使顺利圆满。
记者 李晨宇 台南采访报导
唐嘉良/编辑