公视新闻网 https://news.pts.org.tw/article/708146
8/4鬼门开 台南赤崁炤民众体验做普渡公灯
发布时间：2024-08-03 19:15 更新时间：2024-08-05 08:36
李晨宇 / 台南报导
https://www.youtube.com/watch?v=q420N3SOPqc
礼拜就是旧历七月初一，传统有普渡公灯，替好兄弟来照光，毋过这阵已经愈来愈少；台
南在地团体，伫社区举办工作坊，予民众学做普渡公灯，传承这项民俗。（这则新闻标题
、前言、内文为台语文。）
用红色的色料伫布面顶，一笔一划写吉祥的话语，兼画图做妆娗，尾手才斗篙钱参笠仔就
成做普渡公灯矣。旧历七月民间信仰相信好兄弟会予人放出来，往过常在伫庙口拢通看人
挂这款灯，毋过这阵时代改变，普渡公灯已经真罕看。台南赤嵌社区发展协会烦恼传统技
艺会失去，头摆办工作坊予人来体验，in向望共这项百冬历史的文化阁捡倒转来。
参与民众讲：“特别是揣专册予囡仔去看，然后家己才阁去练习按呢画；另外伫这个歇热
学着有无仝的文化体验。”
赤嵌社区发展协会理事长张耕华讲：“少年辈拢较无接触著这种文化，毋过我伫金门有看
过这种普渡公灯，嘛希望咱台南会使有这种课程。”
根据了解，普渡公灯上起头内底面是点油灯佮蜡烛，后来时代演变才改做电火球仔来炤光
。这个文化，伊的意思就是予好兄弟仔伫凡间会当好行路，阁较重要是代表世间的人对in
的心意。
蓬莱斋工作室黄雉原讲：“瓜笠仔、草笠仔这种会使小可仔遮雨，会当予内底灯莫按呢熄
去。较早(内底)用的是蜡烛、蜡条，若是讲风雨来就惊去予沃著，所以咱就囥这个瓜笠仔
伫咧顶悬。”
文史工作者谢奇峰讲：“是按怎欲用普渡公灯，（好兄弟)对阴间出来的时阵，伫暗夜有
一葩灯就是有一个歇困的所在，遮阳间已经到矣会当好好仔休息，这是非常人性化的设施
。”
七月是慈悲的月份，文史工作者讲，毋干焦有设普渡公灯的文化尔，其实有的庙宇嘛会共
本成囥伫外口的五营做收营的动作，甚至有的嘛暂时先共乌旗请入去庙内，这拢是为著尊
重好兄弟一冬一改转来到阳间的传统文化。
张曼亭/编辑