公视新闻网 https://news.pts.org.tw/article/701460
用本土语导览生物多样性 科教馆讲台语绍介蜂
发布时间：2024-06-23 19:15 更新时间：2024-06-24 08:44
https://www.youtube.com/watch?v=KLVklLSTYFI
母语出头天！台湾科学教育馆最近接着真济民众来探问讲，敢有台语抑是客语的导览。所
以这马嘛是第一改，安排用台语来讲蜂的生态。有家长是认为讲，用台语来讲生物、讲科
学真有意义。科教馆嘛表示，会阁继续办落去。（这条新闻标题、导言、内文是台语文。
）
老师用台语解说蜂的种类，遮是科学教育馆用台语绍介蜂的活动，tshuā囡仔来参加的家
长讲，真济生物或者是科学方面，专门的名词用台语定定毋知欲按呢讲，所以感觉按呢的
活动真有意义，囡仔嘛透过亲身去体验，对蜂有阁较济熟似。
学生：“但是我毋捌对蜂岫直接挖(蜜)起来食，感觉足好耍的。”
家长 Aki：“足罕得看着(台语讲蜂)，所以这改一开放报名，阮就赶紧抢，赶紧报名。较
专业的部份，阮希望予囡仔知影咱台语，嘛会当学着足济专业的智识。”
科教馆对三年前开始开放蜂花园做生物多样性教育，这改伫民众的要求之下，开办蜂的台
语导览，负责解说的蜂类保育协会理事长讲，伊嘛是第一改用台语讲蜂，为著按呢，伊阁
家己去研究一寡蜂类的台语，虽然讲了无辗转，但感受着佮民众做伙学习的趣味。曷若是
专业的智识方面，伊讲，导览上主要是欲予民众了解，蜂对人类的重要性，以及教民众好
好仔佮蜂斗阵。
台湾蜂类保育协会理事长 蔡明宪：“亲像咱拄仔介绍的时阵，足济囡仔伫边仔，伊蜂嘛
足乖的。所以就是想欲共逐家讲，边仔有蜂的时阵，你就予伊做工课就好，莫去想讲欲用
药仔去溅，拢莫按呢。”
一般佮科学有关系的活动，济济台湾人是惯势用华语抑是英语来表达，科教馆讲，亲像这
款台语、客语等本土语言的导览绁落来会继续办理，欢迎逐家做伙来用母语学科学。
陈稷安/编辑