细述合作甜酸苦辣　郑裕玲撩发哥想当年
【on.cc东网专讯】 周润发在《东网巨星》全新节目《发哥有Say》爆料，指曾情倾70年
代电视剧经典萤幕女友郑裕玲（DoDo），今日DoDo就在自己主持的电台节目中，大谈与发
哥合作趣事！
赶剧攰到同发哥瞓街
DoDo表示跟发哥拍剧的时间最长：“特别系《网中人》，成80集，拍咗9个月，套剧系一
路拍一路出街，我哋真系试过喺条街度瞓。之后套剧好收得，即刻再开剧，《网中人》我
哋做有钱人，但《亲情》我做工厂女工，佢做车房仔，𠮶套都成80集，但好彩我五十几集
就‘瓜咗’，开心晒，不过都拍咗半年，所以加埋对咗佢一年几，真系一擘大眼就见到佢
，𠮶阵我住广播道，喺旧TVB附近，所以行过去就返工。”
爆角色不死之谜
她又踢爆发哥爱用方法演技来入戏：“我叫佢做发仔，佢𠮶阵用方法演技，《网中人》我
哋做情侣，佢专登买个wallet（钱包），可以摆到相嘅，未开工前我哋就影咗啲亲密照，
佢特登叫摄影房晒番几张2R相摆喺个wallet入面，𠮶个系佢平时会用嘅wallet。（有冇暗
喜？）冇谂呢样嘢啦，𠮶阵佳视（佳视电视台）执咗，好彩TVB揾我，任何机会都博到尽
。（所以唔理啲男女私情？）系啦，我从来都唔谂，我冇咁单料铜煲，做嘢还做嘢。不过
见佢用啲咁嘅方法又几得意，佢𠮶阵同陈玉莲拍拖，我哋仲一齐饮茶。我都有问佢惊唔惊
女朋友唔钟意，佢就话‘因为我哋唔系咁熟，但又要做一pair，一嚟就要拍，所以要代入
。’之后就受欢迎啦！《亲情》中间我死咗，观众唔钟意，我仲要上《K-100》解释同希
望大家继续支持，所以之后就唔敢再整死我。”
当发哥半个屋企人
DoDo大赞发哥是超级好拍档：“发仔真系好好人，好照顾拍档，有一次演《火凤凰》我哋
喺九龙塘拍外景揸跑车戏，我𠮶日唔舒服，但唔敢同导演请假，因为对咗发仔咁耐，好似
半个屋企人，所以同佢讲我唔舒服，跟住架车即刻‘蓬’一声开咗去，原来佢车我去药房
买药，之后先车返去拍嘢，我惊人误会，我哋𠮶日系喺九龙塘，但只系拍嘢。所以佢好照
顾拍档，非常唔自私，如果系你嘅戏就唔会抢。”
遗失发哥合照
在节目中DoDo呼吁发哥上她节目受访：“发仔，大家合作咁耐，你都60岁人，可以想当年
嘅人有几多，你𠮶阵仲未喺荷里活、内地，而系大家仲青春、挨紧𠮶阵，所以你可以上嚟
怀缅吓，冇乜几多人可以做到，希望你可以上嚟，几点都得，好早都得，跟住放你去行山
兼买𩠌。（发哥话你依家有黄子华㖞？）佢笑住讲啫，佢乜都知，乜都有留意，我怀疑佢
依家都喺度听紧。（你去九龙城撞发哥？）点撞呀？不过多年前我喺西贡拍《男亲女爱》
片头𠮶阵真系撞到佢，行姐（陈彦行）当时好开心，我哋有影相，但啲相唔知去晒边。”
冇发哥联络方法
DoDo又表示没有发哥电话：“得佢fax咋，个fax仲要唔系佢嘅，只系fax到佢经理人。（
用email揾佢？）你觉得佢会有email咩？不过我试过有次喺又一城撞过发嫂，发嫂好热情
，仲即刻揽住我。”
http://goo.gl/IjF4yn