公视新闻网 https://news.pts.org.tw/article/829351
旗津渔港火烧船 至少6只着火、其中3只全毁
https://www.youtube.com/watch?v=8mGXs-CY550
发布时间：2026/9/30 20:20 更新时间：2026/9/30 20:20
许嘉茹 邱绍扬 高雄报导
高雄旗津渔港今仔日（9/30）中昼传出火烧船意外，乌烟冲起去天顶，几若公里外拢会当
看着。民众讲，是停伫咧港内的渔船仔雄雄烧起来，因为船仔停甲密密，有的袂赴徙走，
上无有6只船tòo着火，其中3只全部烧了了。佳哉无人著伤，详细的着火原因阁爱调查。
(这条新闻标题、内容是台文)
吴征扬/编辑
=====
目击民众：
后壁彼索仔伤烧矣，无法度放啦，你人爱先出来（爆炸声）。
看着火势湠遮紧，逐家拢着急欲共船仔徙走。高雄旗津渔港中昼十二点半，一只停咧港内
已经无咧掠鱼的船仔，雄雄着火烧起来，玻璃纤维的船壳、船顶，犹阁有柴球，致使火愈
烧愈大，毋但烧着隔壁船，缚船的索仔嘛烧断去，风若搧，着火的船仔缀涌流去对面，袂
赴徙走的船仔去tòo着火，船头烧甲乌嘛嘛。
船主：
消防队啊，欸，共伊喝一下，你共伊喝一下，帮忙一下啦，遐阁烧起来矣。
目击民众：
这马是烧着第六台矣，头前三台较细，（烧着）船头尔尔，已经离开矣，有两只（船）全
毁矣。
这场火烧船意外，消防佮海巡齐出动，一个伫岸顶，一个对海面溅水、拍火，开点外钟才
共火拍化。消防表示，有三只船仔烧甲真食力，佳哉无人著伤，其中上头起先着火的彼两
只船，已经无咧掠鱼。船长看着船仔烧了了，气怫怫讲，当初船牌共没收去，干焦留船壳
予伊。伊无钱通拆，嘛揣无位通拆，这马出代志矣，伊嘛无才调处理。
船主 庄先生：
船牌共人没收起矣，人船壳欲按怎（处理），著毋著，人那有法度啦，啊你抨伫遐，我就
共怹讲矣，你抨伫遐另工若着火起来咧，到拄到矣，到这阵已经十几年矣，着火矣，啊看
啥人欲处理啊。
港务消防大队高雄港队队长 吴俊毅：
这马目前就是两只废弃的，一只是有人的，（拄开始烧的时，顶悬是毋是有人咧煮物件）
，这部份无啥清楚，爱等阮后续的调查。
火烧船的乌烟冲去天顶，就连几若公里远的所在拢看现现，有民众讲，敢若是有人咧船顶
煮物件造成火烧，不而过发现火烧的外籍移工讲，是船壳边仔的船仔家己烧起来的，到底
着火的原因是啥，阁需要等待消防的调查结果。