公视新闻网 https://news.pts.org.tw/article/759868
光电场开发挡恬 风台共山顶涂糜扫入抾水池
发布时间：2025/7/8 19:15 更新时间：2025/7/8 23:19
https://www.youtube.com/watch?v=zZeybxiZS2Q
高雄大树和山里的光电场，目前业者已经夆停止二期开发计画，毋过山头已经夆摅甲光光
，风台雨一落落来，涂糜就流入去抾水池内底，共排水管窒牢咧。水利局表示，有先挖水
路加强泄水，也派厂商24点钟监控；不而过地方讲，这改雨水无济就有山坪跙落来，水土
保持犹需要阁改进。（新闻标题、导言及内文皆为台语文）
黄色的涂糜浆对临时挖开的排水口一直流出来，大树和山里的二期光电场，因为树仔草仔
全部去予光电厂商剉了了，规粒山头䞐一堆涂，这改风台雨一落落来，涂糜浆就按呢流入
来抾水池内底，虽罔光电厂商进前有埋暗管，水利局也事先挖水路斗泄水，毋过排水管犹
是予涂沙窒牢咧，里长讲，佳哉这摆雨无盖大，若无遮当时欲崩拢毋知。
大树区和山里长 吴顺治：“规个水若食滇的时阵，遮的涂是松的，全部拢挨落来矣，挨
落来共水沟窒牢咧，就会成做一个窟仔；这个窟仔若去予崩去，就会像咱小林村按呢。”
立法委员 柯志恩：“有看着彼爿的挡涂墙嘛，著，无，伊到遮拢无做。到时阵若真正崩
落来，遮就全部拢淹过来。”
水利局讲，现场三个窟仔是抾水沉砂的功能，这摆拢有发挥效果，毋过其中一窟的水路窒
咧造成涂浆流出来，这部份已经要求厂商改善，为著欲监控光电场的安全，in也有派人进
驻和山里活动中心，因为二期计画已经废止，现在这个所在已经袂当阁设光电枋矣。
高雄市水利局主秘 张世杰：“未来水利局会加强要求案场厂商，恢复原底的植生、植被
，降低咱的山坡地可能会受着大水雨冲割的影响。”
里长讲，开发计画废止了后，地方干焦向望政府会当较紧咧，先将挡涂墙的部份做起来，
阁沓沓仔来共树仔草仔种转来，还予里民一个安心的生活环境。
记者 许嘉茹 邱绍扬 高雄报导
唐嘉良/编辑