公视新闻网 https://news.pts.org.tw/article/751010
高雄仁武宠物鳄鱼偷走出门 湖内乌猪四界傱
发布时间：2025/5/13 19:15 更新时间：2025/5/13 20:07
许嘉茹 邱绍扬／高雄报导
https://www.youtube.com/watch?v=QXr2ApPxI_c
高雄市仁武区透早有民众伫路边看着一只一公尺半的鳄鱼咧走，赶紧通报农业局来掠，原
来这只鳄鱼有人饲，无细腻才走出来。另外湖内区嘛有民众饲的黑猪伫大路四界傱，阁冲
红灯险险予车挵，因为已经危害交通安全，警方当咧找揣黑猪主人欲共处罚。（此则新闻
标题、内文为台语文。）
5/12透早七点外，湖内区的湖中路已经变青灯，车辆准备欲起行，毋过对中华街彼爿煞雄
雄傱出来一只黑黑大大的动物，共看较真咧，竟然是一只黑猪，这只猪都按呢生生狂狂伫
车路四界走，甚至阁走入去附近国小内底，因为速度实在伤紧，看着的老师拢叫是家己目
睭花，哪会有猪伫学校走。
高雄市明宗国小校长黄俊杰讲：“其实山猪是沿阮学校的围墙边仔走，无一下仔就走出去
矣，现场有几若位老师佮囡仔有看着，老师佮囡仔看着(猪仔)是诚惊喜，in感觉讲遮山猪
若是会当入来共阮的学生囡仔斗阵上课，嘛是诚心适的一件代志。”
虽罔囡仔欢喜看着猪仔，想欲佮猪仔做伙上课，毋过湖内分局表示，这只猪敢若是去予主
人tshuā转去，因为猪仔乌白走已经危害著交通，这马当咧走揣主人准备开罚。另外5/13
透早{伫仁武也有民众看着一只150公分长的鳄鱼伫路里走，惊一下赶紧通报农业局。农业
局表示，这只鳄鱼予主人饲伫工厂两年外，前一工共徙出来桶仔，才无细腻去予走无去。
高雄市动保处副处长段奇汉讲：“经过调查这只鳄鱼的品种是目镜凯门鳄，体型大约150
公分长，下晡这只鳄鱼的主人郭先生已经有来动保处完成访谈笔录，而且嘛将鳄鱼领转去
矣，动保处呼吁主人爱做好管理责任。”
高雄连绁两工有黑猪佮鳄鱼伫车路赖赖趖，有人感觉心适，佳哉无害人受伤，动保处呼吁
民众，厝内底的宠物爱关予好，若是违反规定，上悬会当罚一万五千箍。
曹咏涵/编辑