公视新闻网 https://news.pts.org.tw/article/746007
歌仔戏团入校办特展 结合台语课教跤步手路
发布时间：2025/4/8 19:15 更新时间：2025/4/8 22:47
李晨宇 / 地方报导
https://www.youtube.com/watch?v=i8W3GVKWC-o
台南德光中学头摆邀请台南在地的歌仔戏团入到校园，举办歌仔戏特展，阁结合学校的台
语课，予学生穿戏服、唱七字仔来认捌这项文化。（新闻标题、导言及内文皆为台语文）
戏班伫台顶一句一句tshuā囡仔唸歌仔戏的七字仔调，阁示范戏中基本的身段、跤步手路
，学生学甲真心适。这摆台南德光中学伫校内人文展示馆，邀请在地的乡城歌仔戏团合作
办特展，欲予学生亲身接触咱台湾真有代表性的传统文化。透过戏服、冠、珠仔头插，阁
有珍贵的文献资料，tshuā逐家认捌歌仔戏的媠。
乡城歌仔戏剧团团长 杨雅萍：“予怹捌一寡歌仔戏上基本的物件，像跤步手路你伫台仔
顶欲按怎比、跤步欲按怎行，其实欲教的物件足济；阁有像刀枪这拢是上基本的物件。你
若戏台仔顶欲好看，遮的物件拢爱知影。”
德光中学校长 杨惠娜：“这马的囡仔对咱台湾的文化无啥物了解，所以阮的德光文化基
金会今年足特别的，请著乡城歌仔戏剧团来学校做展览，来现场介绍抑是一寡文物展，和
囡仔所学做一个呼应。”
歌仔戏发源对宜兰开始，传到今上百冬，对早期农村以唱歌做议量，演变做外台戏，阁进
入广播、电影、电视媒体，到今发展做文化场咧表演。这摆展览怹嘛结合校内台语课，老
师直接共教学搬入展场，予囡仔实际穿戏服，老师嘛模拟扮仙的情境，成做台语课的活教
材。
德光中学学生：“第一改来遮看这展览，阁会使穿这歌仔戏的衫，我感觉足好耍。”
德光中学台语老师 康顺添：“拄仔好上著〈看戏真趣味〉这课，希望台语会当伫囡仔的
生活中，会当予怹钉根、会当予怹生湠，所以咱结合这个展览予怹会当生活化。”
乡城歌仔戏团团长讲，学戏无想的困难，重点是“愿意踏出第一步”。怹团成立已经31年
，团员拢毋是职业班底，是对戏剧有兴趣，利用逐礼拜假日练习、排戏，用行动展现出对
文化的热情。怹表示，未来会继续湠落去，期待咱的歌仔戏通阁传承百冬。
记者 李晨宇 台南报导
唐嘉良/编辑