公视新闻网 https://news.pts.org.tw/article/744227
干焦清明才会食润饼？ 各地头时间、菜料无啥仝
发布时间：2025/3/27 19:15 更新时间：2025/3/27 23:01
https://www.youtube.com/watch?v=RGROySkJjZ0
便若到清明节前后，卖润饼佮润饼皮的店头，拢会出现排队的人阵。但是伫台湾各地头，
润饼kauh的馅有淡薄仔精差，食的时间点嘛无仝。tshuā观众朋友做伙来了解。（新闻标
题、导言及内文皆为台语文）
用面粉、水、盐撋出来的面粉粞仔，抹伫炉仔顶一时仔的时间，一领润饼皮就做好矣，这
担伫清明节前后才有咧卖的润饼皮的店仔，是在地40年的老担，头家讲润饼皮欲好kauh，
大细、厚度拢爱撙节好势
润饼皮店头家 邱炳庆：“阮咧做的时阵爱共揤落去，揤落去的时阵就是咧控制厚度。今
仔日拍（面粉）粞仔起来伊较虬，所以伊共伊（面粉粞仔）sak出来的时阵，规个拢真圆
，就控制佮咱（铁鼎）的面拄仔好是平大张。”
一张润饼皮，会当变出济种口味、无仝的食法的润饼kauh，有人是尾牙食，有人是清明咧
kauh润饼，食食作家陈静宜表示，对润饼kauh嘛会当看出台湾移民文化的痕迹。
饮食文化作家 陈静宜：“台南南部，拢是清明节这个前后咧食的；抑若是台湾北部尾牙
的时阵咧食这个润饼。所以讲，咱食润饼的习惯，嘛是会当反转去，看这个原乡怹是按怎
咧食的。像同安怹伫旧历的2月初2、3月初3、佮冬节这3工怹咧食润饼；像福州是对立春
一直食到热天，所以怹包的是豆菜。”
作家陈静宜表示，润饼kauh缀移民的跤步，传到台湾佮其他东南亚国家，润饼kauh也伫台
湾落土钉根，除了kauh菜蔬、kauh肉，也有包乌鱼子、皇帝豆，甚至发展出kauh涂豆麸佮
冰的食法，发展台湾味的润饼kauh。
记者 杨舒晴 彰化报导
唐嘉良/编辑