公视新闻网 https://news.pts.org.tw/article/733228
用母语教煮食 青年写"就爱这味"台文食谱
发布时间：2025-01-11 19:15 更新时间：2025-01-11 19:42
郭柏均 许猛 庄浚佑 / 台北报导
https://www.youtube.com/watch?v=wsPFXURsf0U
观众敢有看过台文写的食谱？有台语媒体人用台文，出版市面上头一本台语文食谱。伊讲
，这除了是咧数念伊的家乡南投的滋味，也是咧希望逐家通以生活化的方式，来认捌台语
文。（这则新闻标题、前言、内文为台语文。）
“好，所以咱这阵咧，先共这蕹菜切切咧。”
共规把蕹菜提出来，切做几若份。
“好，咱共胡椒粉，共糁一屑仔，阁来豆油。”
共碗公内底的牛肉丝，豉一咧，就会当准备来炒菜，
“好，糁一屑仔盐。”
炒好夹到盘仔内底，排予好势，真好食款的沙茶蕹菜牛肉就完成矣。台语媒体人曾伟旻，
出版市面上头一本全台语文写的食谱，用母语来教人煮食。
《就爱这味》作者曾伟旻：“华语书写，无法度完全来去做呈现的时阵，台语颠倒会当帮
助，咱讲每一个动作，拢无仝款，咱过去有讲熥物件、煠物件，你华语拢是”川烫”，但
是你若是熥物件、煠物件，彼个入水的时间是完全无仝款的。”
曾伟旻讲，出这本台文食谱，除了是伊数念家乡南投的味，也是希望透过这本册，予逐家
用阁较生活化的方式，接触台语文。负责出版的前卫出版社也希望，予逐家用母语熟似食
食文化。
前卫出版社主编郑清鸿：“你连去菜市仔买菜，可能拢毋知彼个菜叫啥物名，著无。而且
台语嘛有诚济，伫咱的食食的文化内底，台语真正是一个诚重要的表现。”
曾伟旻讲，这本册毋但用台文书写，内底也tshuā读者认捌客家族群、原住民族群的食食
，希望透过这款多元族群的展现，予逐家趣味熟似各款族群的料理文化。
张曼亭/编辑