公视新闻网 https://news.pts.org.tw/article/729503
柴山军事碉堡予人喷漆 2个21岁嫌犯落网
发布时间：2024-12-18 19:15 更新时间：2024-12-19 12:48
https://www.youtube.com/watch?v=hT3iYiOSjuw
高雄柴山西海岸步道有一搭军事碉堡，予寿山巡查员发现予人乌白喷漆画图，警察追查三
礼拜后，发现是两个21岁的查埔人，趁无人时阵，扎一袋喷漆来破坏碉堡外观。民众认为
这款行为真无公德心，这马两个嫌犯也予掠，移送法办。（此则新闻标题、导言、内文皆
为台语文。）
行柴山步道来到上倚近海的西海岸，遮就是予人号做“柴山阿朗壹”的神祕所在，想袂到
边仔这个七十冬历史的军事碉堡，予人喷甲五花十色，除了有乌色喷漆画的各种图案，嘛
用彩色喷漆写英文字佮“我爱高雄”，来高雄的观光客看着知名景点予破坏，嘛不止仔受
气，表示“教歹囡仔大细”、“咱伫遮tshit-thô的时阵，伊予咱是一种真美丽的景色，
但是因为你的行为破坏这个环境”、“爱予伊处份一下，干焦罚钱无够，爱有警告的作用
，无逐家拢会学”、“遮尔媠的风景，你共伊画甲按呢足歹看，足无彩”。
寿山国家公园的巡查员伫11月底巡逻时，就发现碉堡予人喷漆，警方去调出柴山百外支监
视器，发现有两个查埔人，对轿车落车，阁扎一袋物件行入去碉堡，真有嫌疑，顶礼拜就
伫桃园、高雄掠著这两个21岁的查埔，伫其中一人厝内底，嘛揣著7罐喷漆罐仔，两个少
年人拢移送法办。
国家自然公园管理处副处长—黄淑菁表示：“因为碉堡伊有原本的功能佮原本的模样，这
马目前予人伫面顶乌白乱皂，绁落阮会处理予伊恢复原本的模样。”鼓山分局嘛提醒，虽
罔碉堡目前是废弃，毋过乌白乱皂是破坏国家自然公园设施的行为，违反国家公园法佮毁
损罪，毋但爱罚3000箍，上重阁会判两年的有期徒刑。
记者 邱绍扬 高雄报导
卢元媜/编辑