公视新闻网 https://news.pts.org.tw/article/728773
《阎罗石磨心》新出头 歌仔戏、布袋戏相敆做伙搬
发布时间：2024-12-13 19:15 更新时间：2024-12-13 21:30
https://www.youtube.com/watch?v=5tRYd2fZtOo
有剧团共布袋戏佮歌仔戏，两种台湾传统戏曲结合做伙演出。怹将舞台重新设计，适应剧
种的特色，予这两种传统戏会当同齐伫台顶呈现。希望予传统戏曲有新的模样，吸引无仝
族群，做伙踏入剧场看戏。（新闻标题、导言及内文皆为台语文）
予范谢将军押走，欲接受阎罗王的审判，演员伫台顶演出，也有布袋戏尪仔做伙搬戏。这
出戏《阎罗石磨心》，共歌仔戏佮布袋戏，两种台湾传统戏曲结合做伙、仝台演出。
《阎罗石磨心》制作人／偶戏领演 陈建霖：“伊凡势是歌仔戏的族群，但是伊无了解布
袋戏；这马可能有一寡是布袋戏的族群，伊无啥了解歌仔戏。这部份伫咧阮遮，这摆的制
作，会当拢有看着，有歌仔调为主体的布袋戏来做呈现，这是阮的特色。既然有这种的歌
仔调布袋戏，是按怎无爱共歌仔戏佮布袋戏做阵来做？”
欲共这两种戏种结合做伙，真人、布袋戏尪仔大细身差真济，是上oh克服的问题。剧团结
合传统布袋戏舞台──彩楼，共舞台对低到悬隔做三层，予尪仔、演员咧同时演出的时，
阁较有层次。
《阎罗石磨心》导演 简育琳：“咱就共伊用做三个层次：可能第一层我就一个人演的戏
，可能占舞台的二分之一，后壁彼个就是咱会分做两个阶段；第二层就是予尪仔、尪仔艺
师，咱的尪仔艺师伫遐弄；第三层我就共布袋戏上盖主要的彩楼，咱共伊囥咧舞台的中央
，予逐家看起去有层次。”
这出戏是一个29岁的少年布袋戏艺师──陈建霖发想，由成立歌仔戏剧团欲20年的资深歌
仔戏演员──简育琳做导演。怹拢希望透过结合无仝剧种，予传统戏曲有新的面貌，吸引
阁较济无接触过传统戏曲的观众来看戏，予台湾传统戏曲通永久流传。
记者 郭柏均 谢季潾 新北报导
唐嘉良/编辑