公视新闻网 https://news.pts.org.tw/article/728590
注射筒当做tshit-thô物 医师：乌白耍恐惊致蜂岫痈
发布时间：2024-12-12 19:15 更新时间：2024-12-12 22:39
https://www.youtube.com/watch?v=gkwrfMyalxE
前一阵仔中国彼爿咧流行的tshit-thô物仔“塑胶刀”，传到台湾校园内。最近，中国阁
有一种新的tshit-thô物仔，比进前的塑胶刀阁较危险，是一种模仿医生注射的物件，阁
有佮1枝注射筒。就有医生提醒，若是乌白耍，共注射筒注入去咱人的身驱内，可能会有
蜂岫痈的风险。（新闻标题、导言及内文皆为台语文）
提棉仔共尪仔消毒，绁落来提出这枝危险的注射筒，对尻川注空气落去，尪仔就若像生
thiāu仔的形，一粒一粒，这是最近伫中国国小校园咧流行的tshit-thô物仔。北部的国
小校长表示，虽然犹未传入来到台湾的校园，毋过怹最近真骨力伫校园进行宣导，避免产
生风险。
台北市大佳国小校长 林光媚：“其实像进前的塑胶刀佮这改的空气针，其实阮逐改看着
新闻，知影有囡仔爱耍这项物件，阮就会利用儿童朝会，较紧共囡仔宣导。”
针对这款通注射的tshit-thô物仔，台大医生表示，这种空气注到囡仔身体，虽然量真细
，袂去影响到性命。毋过，若针头无清气，是会有蜂岫痈的风险。
台大医院小儿部医师 杨永立：“伊这针头一定无清气，所以就实务来讲，伊局部蜂岫痈
感染的风险，犹是较悬一寡。”
像这款危险的tshit-thô物仔，塑胶刀、蜡皮糖、空气针，卫福部表示，这寡tshit-thô
物仔本身有可能有塑化剂超标的风险，提醒家长爱特别注意，千万毋通予囡仔去磕著来路
不明的tshit-thô物。另外，教育部嘛表示，已经通报地方政府佮校园爱进行宣导，予囡
仔避免去接触这款危险的tshit-thô物仔。
记者 郑亚宣 许猛捷 台北报导
唐嘉良/编辑