公视新闻网 https://news.pts.org.tw/article/726204
《孙翠凤和她的男人们》出版 记录戏班万项代
发布时间：2024-11-27 19:15 更新时间：2024-11-28 08:40
https://www.youtube.com/watch?v=E-Qz6_lB8Vo
台湾歌仔戏国宝孙翠凤，出了一本册予做《孙翠凤佮伊的查埔人》，记录伊伫台顶演过的
小生、遮的查埔人的角色，伊也讲家己原本是台语讲袂辗转的外省人，嫁入去歌仔戏大家
庭“明华园”，一路对小旦做到小生的过程。伊伫戏棚跤、生活中的查埔人——明华园的
总团长陈胜福，嘛来到现场共牵手支持。（此则新闻标题、导言、内文皆为台语文。）
台湾歌仔戏演员孙翠凤有出一本册，记录著伊伫戏台顶做查埔人、演小生，对小旦安怎变
做当柱小生。而且伊戏棚跤的查埔人、也就是伊个翁婿——明华园总团团长陈胜福，嘛来
到现场，共伊支持。
孙翠凤出新册，名号做《孙翠凤佮伊的查埔人》，纪录伊伫戏台顶演过的小生的角色。孙
翠凤嘛特别分享，家己原本是连台语拢讲袂辗转的外省人，嫁入去歌仔戏大家庭“明华园
”，对学台语、唱歌仔戏，一路到搬戏的过程。伊表示：“你想欲予这个大家族会当认同
你这个外省婆仔，你就爱有所牺牲，最后欲上台表演毋是遐尔仔简单，阮的台语爱学甲足
准确的，而且要学文言文、爱阁学日语佮俗语。”
孙翠凤的翁婿陈胜福嘛特别分享，伊的牵手拄学歌仔戏的笑诙代：“孙翠凤上台讲口白，
讲一句尔，阮爸爸冲去后台，共阮导演、阮弟弟讲，你莫予恁三嫂去演戏，按呢伊的台语
无人听有！”
孙翠凤讲对小旦演到小生，伊拢总用三年的时间去研究查埔人，内面有浪子、有皇帝、阁
有法力无边的大仙。伊讲过程虽然辛苦，毋过伫伊的性命内面，从来就无“放弃”这两个
字。这马，对伊来讲上重要的就是对歌仔戏的传承，这个决心伊嘛绝对袂放弃。
卢元媜/编辑