公视新闻网 https://news.pts.org.tw/article/715207
中秋节也是月老生 济信众拜拜祝寿领姻缘饼
发布时间：2024-09-17 19:15 更新时间：2024-09-17 19:44
吕尚儒 庄浚佑 / 采访报导
https://www.youtube.com/watch?v=B1QtbuWcaCE
中秋除了食圆仔、烘肉、看月娘，旧历8/15阁是月老的生日。台北霞海城隍庙的月老，已
经有超过半世纪的历史，为著欲共月老祝寿，今仔日有济济民众来参加团拜，嘛共拜过月
老的姻缘饼分予民众，另外阁有日本冲绳的艺阵佮大稻埕的北管轩社、鼓亭来献艺。（此
则新闻标题、导言、内文皆为台语文。）
旧历八月十五中秋，是一家伙团圆的节日仔，嘛是月老圣诞的日子，17有济济欲求好姻缘
的民众，来到台北霞海城隍庙参加月老祝寿的仪式，食喜糖、领姻缘饼。
民众讲：“线顶抽签诗的网站，然后伊就有寄批予我，讲今仔日有这个活动，希望会当揣
著好姻缘按呢。”
民众讲：“阿母共阮讲中秋节是月老的生日，然后无一个有男朋友抑是女朋友，所以就叫
阮来拜。”
提着姻缘饼的民众拢真欢喜，日头诚炎，犹是有各地的民众专工来拜拜、求红线抑是还愿
。另外，中秋这工，阁有日本冲绳来的狮阵佮太鼓队，来到霞海城隍庙献艺、祝寿。
狮仔伫庙埕辗来辗去，不止仔活泼，现场民众看甲真欢喜。台北霞海城隍庙表示，阁过一
两个月，就欲共月老请到冲绳交流，所以冲绳的艺阵就趁月老圣诞这日来表演致敬。
台北霞海城隍庙文宣组长吴孟寰：“除了疫情的时阵，咱每一年拢有去冲绳，去遐毋但神
明去，阁有in讲台语、做台湾菜，抑是讲做一寡台湾的DIY，就是讲咱家己的故事，讲咱
家己的文化，月老毋但牵姻缘，嘛是牵咱两个所在的文化，共牵起来按呢。”
庙方表示月老是管各种缘份的神明，希望透过祝寿仪式、分姻缘饼，予民众无论是姻缘、
人缘拢顺顺利利，嘛向望台湾透过民俗文化的交流，通和世界结好缘。
曹咏涵/编辑