公视新闻网 https://news.pts.org.tw/article/709373
第25届台语文化营 分享野外煮食佮生活撇步
发布时间：2024-08-11 19:15 更新时间：2024-08-12 09:25
李晨宇 / 地方报导
https://www.youtube.com/watch?v=oRrtrnwVDig
台湾罗马字协会，连绁25冬，逐年拢会办“世界台语文化营”，今年以野外求生做主题，
教大人囡仔欲按怎伫野外煮食佮生活。（此则新闻标题、导言、内文皆为台语文。）
囡仔用台语成做魔术师，干焦靠一张牌施魔法，就通共规副固定好势；嘛有囡仔用白话字
造词画尪仔，展现课程所学着的成果。为著欲共台语向下钉根，台湾罗马字协会对1995年
办世界台语文化营到今。今年第25届，以非常时期的野外求生做主题，打造全台语的环境
，嘛培养囡仔母语意识。
囡仔表示：“我学用台语变魔术，等一下欲展予逐家看，我感觉真趣味。”
家长，杜先生表示：“我一个囡仔今年欲上国小矣，予伊知影讲其实有足济囡仔，嘛是咧
讲台语的，伊熟似一寡大人，用无仝的议题(来分享)。”
台湾罗马字协会理事长，蒋为文表示：“台湾这几年拄著中国军事的威胁，咱嘛爱准备，
万一中国若是真正侵略咱台湾，咱台湾伫战争的时期，欲按怎伫野外求生。”
课程毋但安排专题演讲，咧绍介国内外战争的历史。另外，嘛邀请南北二路长期咧推sak
台语文的有志来分享经验。台湾罗马字协会常务理事陈金泉指出，因为受着殖民佮政治的
因素，致使台语有一段足长的断层，加上家长无注重，尾手in对教会拓展到社区咧推sak
。另外，嘛有协会用语言行销的方式，设计趣味的手路，欲唌人来学习。
台湾罗马字协会常务理事，陈金泉表示：“少年人拢差不多袂晓讲，毋但少年人和较年长
的，有的嘛袂晓讲，因为按呢的关系，所以整个语言的意识会当提悬，予遮的人民拢知影
，台语是遮尔要紧的物件。”
打狗台语文促进协会理事，吴家铭表示：“共台语文当做产品，这就是一个行销的手路，
去佮其他的物件就是去比并，有一个较趣味较活跳，较无仝款的方式。”
三工两暝的文化营，分做大人佮囡仔组，拢总上百人来参加。主办单位指出，向望台语文
成做生活化，母语的前途，才会当光明大葩尾。
陈怡臻/编辑