公视新闻网 https://news.pts.org.tw/article/686560
轻铁上落车爱鑢卡 悠游.一卡通锁卡机制无仝
发布时间：2024-03-21 19:15 更新时间：2024-03-21 20:02
https://www.youtube.com/watch?v=ZzVe_c2l6FQ
高雄轻铁头佮尾已经接起来，民众出门拢真捷坐轻铁囉。毋过最近有民众反应，若是提悠
游卡、一卡通去坐，一定爱鑢卡，特别是悠游卡，若是无鑢，卡片会锁起来，后回若是赶
时间，就诚无方便囉。
高雄轻铁营运收费欲满月囉，上下车拢爱伫月台鑢卡收费，若是袂记得鑢卡，票卡就会予
锁牢，锁牢的票卡，敢会当坐其他的交通工具咧，有民众就发现讲，提悠游卡坐轻铁无细
腻予锁卡，煞袂当坐火车佮高雄捷运，若是一卡通就会使，实际问民众，逐家拢无知影两
张卡若是予锁卡了后的差别，认为应该爱加宣导。
民众讲:“一卡通按呢比悠游卡阁较好，我是感觉按呢。”、“若是悠游卡予锁卡，其他
拢袂当坐，若是一卡通拢是予锁卡，阁会当坐捷运会较方便，无定着会当结合做伙，会当
宣导抑是贴一寡公告，共民众讲欲按怎处理遮的方法。”
目前悠游卡佮一卡通，总共已经发出两亿外张，一卡通公司表示，因为两间公司设计本底
就无仝款，若是一卡通予锁卡，提卡去坐高雄捷运佮台铁是无影响，毋过若是悠游卡，干
焦会当坐台北捷运尔，而且民众爱去轻铁站解卡，才会当继续使用。
一卡通票证股份有限公司协理徐毓钟讲:“毋管是高雄轻铁高雄捷运抑是台铁，其实拢是
阮配合的特约机构，毋管是伫营运规则抑是合约，抑是交易的一寡资安，阮其实拢是对应
主管机关这爿合法合规，进行相关的流程设计，其实伫每一个运距抑是服务通路，拢有对
立的独立系统独立运作。”
高捷公司提醒，若是民众坐轻铁，卡予锁牢，阁去轻铁站鑢一摆，高捷公司也伫六个捷运
站设置轻铁解卡的机器，方便民众使用。
张曼亭/编辑