公视新闻网 https://news.pts.org.tw/article/683194
台南百年“担饼节” 爸母担饼、款囡仔衫谢神恩
发布时间：2024-02-29 19:15 更新时间：2024-03-01 08:28
李晨宇 / 采访报导
https://www.youtube.com/watch?v=npoidNH_IvM
台南永康广兴宫，传承百年的“担饼”，也是地方重要的民俗活动。只要旧年厝内面有婴
仔出世。厝内的人就会担水饼、款囡仔的衫仔裤，来庙里叩谢神明。今年拢总有19户来答
谢，嘛共这寡饼送予逐家，食平安、添岁寿。
囡仔的爸母一大早担饼头、兼攒一套囡仔全新的衫仔、裤、鞋仔来感谢众神保庇。台南永
康广兴宫每冬旧历正月20办担水饼活动。相传过去村民为著欲祈求厝内会当添丁，逐家相
招来向众神下愿，落尾才阁倩戏谢神兼担饼分送。庙方讲，这阵来参加担饼的，拢是旧年
厝内有红婴仔的家庭，嘛阁分送予有参加福份的民众佮耆老食平安添岁寿。
参与居民讲:“来担饼后生生孙仔，囡仔欢喜心来分享，逐家老岁仔人食一下甜甜。”、
“阮翁的老厝伫遮，所以百年传统逐家拢会参加，阮第一胎嘛有来，希望会当祈求囡仔平
安健康大汉。”势广兴宫董事长林进旺讲:“福份饼就是你有参加福份就有这个饼，另外
老大饼就是，恁兜若有六十岁以上的查埔人，就有这份饼按呢。”
今年计总有19户抱囡仔来庙埕担饼分享喜气，庙方嘛准备平安七星桥予逐家通元神光彩、
平安顺序。另外有台语老师家己写词谱曲，来绍介担饼的文化。董峰政老师认为，用旋律
传唱是传承上盖紧的方式，现场嘛唌济济人来体验唸台语诗的心适。
民众讲:“第一改唸担饼的唸谣，我阁唸了足顺，唸了的时阵阁赏我。”台语老师董峰政
讲:“共我细汉的记持一首一首共写落来，我写我头前这个许县溪，这叫做台南母亲之河
，过来我想答谢爸母，所以我有写爸母恩，阮是拢用歌谣来咧传湠啊，拢台语诗。”
担饼文化有上百冬历史，已经予人列做市定民俗。往过担水饼干焦开放予男性参加，毋过
这马社会已经是男女平权，阁加少囝化真严重，所以毋管是查埔查埔拢会当参加。
张曼亭/编辑