公视新闻网 https://news.pts.org.tw/article/674568
一生为歌仔戏 杨丽花登录做北市文资保存者
郭柏均 张育睿 王兴中 / 台北报导
发布时间：2024-01-03 19:15 更新时间：2024-01-03 19:35
https://www.youtube.com/watch?v=uu0zmyCkpec
台北市文化局昨昏依照无形文化资产审议结果，共歌仔戏演员-杨丽花登录做传统表演艺
术-“歌仔戏”的保存者。文化局表示，杨丽花是歌仔戏的代表性人物，对歌仔戏贡献真
大。（此则新闻标题、导言、内文皆为台语文。）
杨丽花 歌仔戏
听着这段逐个人拢熟似的声音，就知影歌仔戏国宝杨丽花来矣。杨丽花的爸母拢是歌仔戏
演员，所以伊的搬戏人生自细汉就开始，对野台戏开始、到内台戏、落尾进入通人知的电
视台，杨丽花成做出名人物。杨丽花注心歌仔戏70几年，除了演出、也牵教后辈，甚至共
歌仔戏推广到海外，对歌仔戏贡献真大，台北市文化局也共杨丽花登录做传统表演艺术歌
仔戏保存者。
台北市文化局副局长 陈誉馨
伊(杨丽花)经历过内外台
阁有电台 电视 阁有电影的磨练
会使讲是台湾非常出名
的歌仔戏代表性人物
也培养非常济后辈
伫旧年5月底，公视、台视、国家影视听中心共同制作的杨丽花纪录片开镜，踮咧伊身躯
边的，是伊的徒弟，也是台湾出名歌仔戏演员陈亚兰。陈亚兰捌讲，杨丽花是伊的恩师，
伊真佩服杨丽花、用青春岁月传承歌仔戏的精神。
陈亚兰歌仔戏团长 陈亚兰
伊真希望共咱台湾唯一的戏曲文化
伫台湾土生土长的文化
会当阁较发扬伫咧
除了咱本土 咱台湾以外
国际上伊嘛希望会当看着遮尔媠的戏曲文化
伊定定拢讲一句话
伊毋认老 食到老 学到老
无牙嘛欲哺土豆
嘛是欲共歌仔戏传承落去
陈亚兰讲，杨丽花也直透缀时代咧行，用电脑科技结合歌仔戏，伫剧场演出，予歌仔戏通
一直创新、唌少年人来看。牵教徒弟的热情也一直拢伫咧，陈亚兰讲，只要伊有推出作品
，杨丽花犹是会针对剧本、音乐、搬戏调度等方面，共伊指导，对真济方面拢会当看出杨
丽花对歌仔戏的坚持佮热情。
洪家馨/编辑