https://news.pts.org.tw/article/545744
中秋风俗各地无仝 但总包含祖先智慧.历史文化
洪敏真 张育睿 / 台北报导 发布时间：2021-09-21 19:15 更新时间：2021-09-21 19:40
https://youtu.be/0IMI1BcN9nw
今仔日中秋月圆人团圆，毋但食月饼，过去农业社会靠天食饭，作穑人拢会伫田头田尾拜
土地公、答谢土地公的看顾。今仔日嘛是土地公生，有人嘛会伫入秋开始做平安戏谢神，
中秋嘛会使讲是咱的感恩节。
削开的竹仔内面，櫼规叠的土地公金，阁来香囥横的，才阁共竹仔插伫田头，这是伫民间
得欲失传的土地公拐。
《台湾的土地公》作者王健旺(2021.03.14)：“春天的时阵会共伊拜，一直到秋天收成的
时，会阁再来拜一摆，这足趣味。这想法就是讲，因为土地公会替咱巡田水、巡田园，所
以是毋是讲，伊老岁仔人就予伊一支枴仔，多谢土地公对咱的护持、对咱的照顾，咱也予
伊好行路。”
也因为中秋是土地公大生日，有人会伫入秋开始做平安戏谢天，也会提米做的麻糬拜土地
公，予伊食甜甜希望黏钱来。俗语话讲：“年惊中秋、人惊四九”，意思是讲一年当中，
上惊搪著中秋，因为中秋过，一年就又阁欲过矣，抑若人上惊过49岁，因为人生若像过一
半去。所以中秋也有掷绣球招亲和听香的风俗，就是望年底前会使有好归宿。
民俗乱弹执行编辑温宗翰：“你若讲你犹未嫁、你也犹未娶，你著爱准备香伫厝里拜拜，
拜好顺这个香的方向，你共伊探过去；你若探过去了后，听着的第一句话若是讲好话，通
常咱就会感觉讲，我的姻缘咧欲到位矣。”
问姻缘以外，中秋也犹阁有跋状元文化、希望金榜题名。
民俗乱弹执行编辑温宗翰：“过去讲秋尾考试、讲科举考试，拢是伫中秋节的时阵，所以
过去嘛有跋状元，后来嘛变做是咱这马看会著的跋饼。”
民俗专家温宗翰表示，虽罔时代改变，传统风俗渐渐流失，不过中秋就若像是咱的感恩节
，人民谢天谢地的精神到今犹是有，也值得咱进一步探讨了解。