公视新闻网 https://news.pts.org.tw/article/729967
冬节大团圆 母语团体办活动挲圆仔、讲典故
发布时间：2024-12-21 19:15 更新时间：2024-12-21 19:46
张君豪 / 新竹报导
https://www.youtube.com/watch?v=tWc_bIy2eck
拜六是冬节，嘛有人讲冬节是“小过年”，依照民俗，这工逐家拢会食圆仔，代表团圆的
意思，新竹母语团体就招逐家，除了用台语讲冬节的故事，阁安排动手挲圆仔活动，用趣
味的方式予囡仔自然来接触台语。（这则新闻标题、前言、内文为台语文。）
“冬节圆，挲圆圆，圆圆趁大钱。”
那唱圆仔歌那跳舞，逐家拢笑甲真欢喜，嘛趁机会讲冬节的故事、解说冬节是一年当中、
日头最短、暗暝上长的一日、予囡仔知。
除了唱歌跳舞、讲台语故事，现场阁有挲圆仔活动，无论大人囡仔逐家拢耍甲笑咍咍。
参加民众：“予(囡仔)体验为啥物，这个节日爱挲圆仔，嘛予in动手做，了按怎挲圆仔，
予in知影这款趣味。”
参加民众：“予囡仔过台湾的节日。”
新竹母语团体特别伫冬节，招逐家做伙来动手挲圆仔，另外阁煮咸佮甜两种无仝口味的圆
仔予逐家食。
新竹母语囡仔窟成员Mono：“因为这马社会较少这款传统的物件，所以阮就想讲会当用这
活动，共这(挲圆仔)传统的例，和一寡活动继续传落去，无若是咧厝内，嘛罕得有这(挲
圆仔)的机会。”
民众沈雪芳：“阮的传统就是暗时，冬节进前一暗食咸圆仔，隔工冬节彼早起就食甜圆仔
。”
冬节团圆食冬节圆，食煞就加一岁，传统伫这工也爱煮圆仔汤拜祖先、拜神明，“谢冬”
感谢规年迵天的保庇。透透过活动、予囡仔那耍那缀咧讲台语，也予逐家感受过节的气氛
。
张曼亭/编辑