公视新闻网 https://news.pts.org.tw/article/677313
台南逐年新正进前 招民众体验封平安茶活动
李晨宇 台南报导
发布时间：2024-01-20 19:15 更新时间：2024-01-20 19:56
https://www.youtube.com/watch?v=laqrs8kCuEE
连鞭欲过年，台南和胜堂佮普济协会伫旧历过年前，会办封平安茶活动，共旧年囥伫瓮仔
的茶米，提出来泡予逐家啉平安，阁会封新的茶米囥入瓮仔，才提去神明桌拜一年，逐年
拢按呢延续落去。
庙方人员沓沓仔徙振动，共这个伫庙内囥一冬久的瓮仔捀出来，旧年封的茶米，准备欲做
开封的仪式。每冬旧历过年进前，台南和胜堂参普济协会拢会办封平安茶文化活动，共旧
年封起来的茶米拍开了后，才阁封新的入去瓮仔内。庙方讲，每冬济济民众会来体验，予
逐家那 khat茶米那祈求新年的愿望，落尾才阁提去神明桌拜一冬。
庙方指出，今年拄仔好是12冬一科的王献大典，配合封茶文化，嘛特别准备一包茶米欲添
载予代天巡狩，祈求众神庇佑地方平安。毋干焦按呢，连附近的高中生嘛实际来行踏、熟
似在地文化，甚至阁发挥专长来遮做茶师，提旧年封的茶米泡予逐家啉平安。
一年一改的封茶文化，到今愈办愈盛大，庙方这改激头脑发挥创意，寿桃有添寿的意涵用
这个壳仔，通予众人共平安茶米贮转去。希望用这趣味的方式，予众人认捌社区多元的宗
教文化。
张曼亭/编辑